"Siz Payambarni ko'rganmisiz?"(2-kitob)

Makka davrichalik yaxshi bilmas edim. Shuning uchun Madina davrini daqiq o‘rganishga astoydil kirishdim va yillar davomida bir necha moʻtabar siyrat asarlarini, ayniqsa muhaqqiq ulamolarning kitoblarini ko‘proq mutolaa qildim. Maʼlumotlarni asl manbalardan izlab topishga, ixtilofli masalalarni qiyosiy tahlil etishga va muhaqqiq ulamolarning ilmiy xulosalarini o‘rganishga harakat qildim. Bu izlanishlarim Islom oliy maʼhadidagi darslarimda ham asqotdi. Orada o‘zbek tilida nashr etilgan, siyratga oid bir nechta kitoblarni ilmiy jihatdan tahrir ham qildim.

    Kitobni yozishga bir necha bor urinib ham ko‘rdim. Har gal savol tuzish, maʼlumotlarni bayon qilish uslubimdan qoniqmay, ish to‘xtab qolaverdi. Yangi-yangi usullarni qo‘llab ko‘rdim. Kitobning birinchi qismini yozish tajribasi, 2002 yildan beri Maʼhaddagi ilmiy faoliyatim va kitobxonlarning fikr-mulohazalaridan kelib chiqib aytmoqchimanki, test tuzishda urg‘uni muhim nuqtaga berish katta mahorat talab qilar ekan. Qolaversa, test uslubida yozilgan bu kitobdan ko‘zlangan asosiy maqsad o‘quvchini faqat imtihon qilish emas, balki unga aniq-tiniq ilm ham berishdir.

    Fazilatli ustozimiz shayx Muhammad Sodiq Muhammad Yusuf hazratlari «Rasululloh sollallohu alayhi vasallam va ahli bayt» nomli kitobimizga yozgan so‘zboshida: «Endi siyratni faqat o‘rganibgina qolmay, bu ilm bo‘yicha kelgan maʼlumotlarni tekshirish, tahlil qilish va saralash saviyasi ham paydo bo‘ldi», degan edilar. Ayni shu tavsiya kitobimiz yozilishida dasturul amal bo‘ldi, yaʼni maʼlumotlarni tekshirish, tahlil qilish va saralashga harakat qilindi.

Kitobning ikkinchi juzini yozishda quyidagilarga eʼtibor qaratildi:

1) savollarni tuzishda har bir musulmon Rasululloh sollallohu alayhi vasallamning siyratlari haqida bilishi kerak bo‘lgan maʼlumotlarga ko‘proq eʼtibor berildi;

2) savol berishdan oldin voqea-hodisalar qisqacha bayon qilindi;

3) voqea-hodisalar xronologik uslubda – davriy tartibda keltirildi;

4) savol ostidagi ehtimoliy javoblarga imkon qadar turli kitoblarda keladigan ixtilofli maʼlumotlar kiritildi;

5) to‘g‘ri javoblarni tanlashda moʻtabar va moʻtamad manbalarga suyanildi;

6) ixtilofli o‘rinlarda muhaqqiq ulamolarimizning tahqiqlaridan foydalanildi;

7) to‘g‘ri javoblar ostidagi izohlarda o‘quvchilarga ilm bo‘lishi uchun qo‘shimcha maʼlumotlar keltirildi;

8) sanalar ham hijriy, ham milodiyda berildi;

9) qo‘shimcha maʼlumot olish uchun manbalar havola shaklida berildi;

10) o‘quvchilar o‘qib-yodlab olishlari uchun oyatlarning arabiy matnlari ham taqdim etildi;

11) kitobning qiziqarli va ommabop bo‘lishi doim eʼtiborda tutildi.

    Samohatli ustozimiz shayx Muhammad Sodiq Muhammad Yusuf hazratlari bu kitobning birinchi juziga yozgan so‘zboshida: «Umid qilamizki, muhtaram muallifimiz Abdul Azim domla yana bir g‘ayrat qilib, Payg‘ambarimiz sollallohu alayhi vasallamning hijratlaridan keyingi siyratlarini ham xuddi avvalgi juzga o‘xshatib o‘quvchilariga taqdim etadi. Bunda Alloh taoloning O‘zi yordamchi bo‘lsin», deb umid bildirgan edilar. U zotning ushbu targ‘iblari ham bizga ilhom baxsh etib turdi.

    Kitob yozib bo‘lingach, katta ustozlarga taqdim qilinib, ularning fikr-mulohazalari ham olindi.